(سفينة نوااااح)
بكت السما
هدرت دموعها بالالم
شلال بيحصد في الهمم
يهد عزم المحترم
يلبس طرح بدل العمم
وف وسط وسط المعمعه
لمحت عنيا سفينة نوح
جريت بابني وكان صبي
ردت ساعتها فيا الروح
قولت اني فيها مطلبي
سمعت فيها بكا ونوح
ولفين ياربي مهربي
اصل اللي سايق مش نبي
شد الشراع عكس الهوا
وطلع غبي
زعق الرجال
ياعم رايحين ع المحيط
الموج بيضرب في الضلوع
غدار وقعره كمان غويط
قال الغبي
انا مش نبي
واللي انتو فيها مركبي
وامري مطاع
انا اللي من حقي الكلام
وانتم عليكم الاستماع
مسمعش صوت
واللي حيشكي من مرض
واللي يقولي ابني جاع
نهايته موت
فاهمين تمام
انا اللي ماسك الشراع
انا اللي في ايديا الزمام
خلص الكلام
بصيت بعيني علي الصبي
لقيته شاب
رفعت ايدي للسما
والف باب
دعيت ساعتها ع الغبي
يدوق العذاب
انا الحقيقه عرفتها
لأ شفتها
لأ عشتها
سفينة نوح كات لنبي
اما السفينه اللي انا ركبتها
سفينة غبي
****************************
محمود ناصر
ليست هناك تعليقات:
إرسال تعليق